Մեկնարկում է «Աջակցող տեխնոլոգիաների նախագծման ինժեներական մրցույթ (ATDEC 2021)»-ը, որը եզակի մարտահրավեր է ամբողջ հանրապետության երիտասարդ ինժեներական և հետազոտական թիմերի համար` մշակելու աջակցող տեխնոլոգիաներ, որոնք կբարելավեն ու կմեծացնեն աջակցության կարիք և հաշմանդամություն ունեցող մարդկանց հնարավորությունները հասարակության շրջանում։
Մրցույթը տեղի է ունենալու երկու փուլով, հետևյալ անվանակարգերում՝
- Աջակցող էլեկտրոնային սարքեր,
- Աջակցող ծրագրեր։
Մասնակից թիմերը պետք է առաջին փուլում ներկայացնեն իրենց լուծումները սարքավորումային նախատիպերի կամ ծրագրային լուծումների տեսքով, իսկ առաջին փուլը հաջողությամբ հաղթահարած թիմերը, երկրորդ փուլում հատուկ տեխնիկական և նյութական բազայով հագեցած միջավայրում, երեք օր անընդմեջ լուծեն և ժյուրիին ներկայացնեն իրենց լավարկված լուծումները՝ հաշվի առնելով ներկայացված լրացուցիչ պայմանները:
Անվանակարգերից յուրաքանչյուրի համար նախատեսված է՝ առաջին տեղ (1,500,000 ՀՀ դրամ), երկրորդ տեղ (1,250,000 ՀՀ դրամ) և երրորդ տեղ (1,000,000 ՀՀ դրամ) մրցանակային ֆոնդ։
Մրցույթի ազգային հաղթողը կարժանանա լրացուցիչ 2,500,000 ՀՀ դրամ մրցանակի։
Մրցույթի մասին մանրամասն ինֆորմացիան՝ http://www.atdec.net կայքում։
Մրցույթը կազմակերպվում է Հայաստանի ազգային պոլիտեխնիկական համալսարանի Հայաստանի ազգային ճարտարագիտական լաբորատորիաների (ANEL) կողմից Tech2Life նախաձեռնության - ՄԱԿ-ի Զարգացման ծրագրի և ՅՈՒՆԻՍԵՖ-ի «Բարելավված ծառայություններ հավասար մասնակցության և ներառական զարգացման համար» համատեղ ծրագրի շրջանակներում, որը կոչված է աջակցելու ՀՀ կառավարությանը հաշմանդամության գնահատման և ծառայությունների մատուցման համակարգի բարեփոխմանն ուղղված իր ջանքերում՝ ապահովելու համար հավասար հնարավորություններ։
